又做商務艙嘅豆腐,又遇上一家神奇嘅香港家庭 ✌🏼️ 話說呢本身部機係用兩艙等地區性客艙嘅A330(33Z),但後來航機調動變左三艙等長途客艙嘅A330(33G),經濟艙小左一百個位,自然有一堆幸運兒被升艙到商務同埋特選經濟艙啦,被upgrade到商務艙嘅呢一家三口一上機就同豆腐投訴啦
港男「我想話有冇搞錯?我明明揀左窗口位,宜家冇左」
豆腐「嗯先生,或者我幫你睇下有冇辦法轉位,不過今晚全滿,我要搵地勤同事幫手,麻煩你要稍等一陣」
港男「係咪我冇Keep住上網睇個位,你一黎就話要upgrade我上黎?搞錯」
豆腐「唔好意思呀先生,因為航機調度所以轉左機型」
港男「你做乜唔通知我?你呀,做乜唔通知我呀?」
豆腐「先生,其實我都係返到公司先知,都係起飛前兩個鐘先知,不過我宜家去搵地勤同事睇下有冇辦法幫你轉位」
港男「你都冇問過我就upgrade我」
豆腐「先生,或者咁啦,如果地勤同事真係搵唔到吉位的話,你又覺得升艙令你唔舒服的話會唔會考慮去經濟艙嘅窗口位坐?」
港男「咁又唔洗,冇野啦,商務艙都幾好」
隔離A位個鑽石會員突然彈左句「驚死成機人唔知你係Upgrade上黎架咩?!知唔知個醜字點寫?」
淨返落黎幾粒鐘呢個男人都冇出過一句聲話要投訴,而佢老婆同個女不停自拍,疑似好滿意呢次嘅Upgrade,老實講佢可以堅持唔Upgrade架啵,唔知如果叫左地勤同事上黎,佢會點樣呢?!
唉家下香港人真係乜都要嘈一餐,以前超賣鬧,坐唔埋鬧,班機Delay鬧都好平常,但宜家點解就連班機早左到都鬧,Upgrade一家人都鬧呢?!呢個社會好病囉…老實講成日話新加坡人中意投訴,其實佢地上黎係享受服務,係唔滿意先嘈,但今時今日有一部分香港人係一上機就搵錯處,一味嘈到全世界都知,意圖想搵著數…
可能某日方丈日報頭版會咁講
「轉機型強行升艙 魚翅貴客一肚氣」📰
Search